କିଏ ନବୀନଙ୍କ ପଛରେ ରହି ଦଳକୁ ପରିଚାଳନା କରିବ

ଭୁବନେଶ୍ବର: ନବୀନ ପଟ୍ଟନାୟକ ବିଜେଡି‌ ସଭାପତି ଅଛନ୍ତି ଓ ରହିବେ। କିନ୍ତୁ ଦ୍ବିତୀୟ କ୍ଷମତା କେନ୍ଦ୍ର କିଏ ହେବ? କିଏ ନବୀନଙ୍କ ପଛରେ ରହି ଦଳକୁ ପରିଚାଳନା କରିବ? ପାଣ୍ଡିଆନ୍ କ’ଣ ସତରେ ବିଜେଡି ଛାଡ଼ି ବାହାରକୁ ଚାଲିଯିବେ? ଦଳର ସାଂଗଠନିକ ନିର୍ବାଚନ ପ୍ରକ୍ରିୟା ଚାଲିଥିଲା ବେଳେ ଏସବୁକୁ ନେଇ ଏବେ ବିଜେଡିରେ ଚର୍ଚ୍ଚା ଜୋର୍‌ ଧରିଛି। ପାଣ୍ଡିଆନ୍ ବିଜେଡିର ପ୍ରଚ୍ଛଦରେ ରହି ପରିଚାଳନା କରୁଥିବା କଥା ଅଛପା ନାହିଁ। ବିଜେଡିର ଜଣେ ନେତା ନବୀନ ନିବାସରେ ତାଙ୍କ ସହ ଫଟୋ ଉଠାଇ ସାମାଜିକ ଗଣମାଧ୍ୟମରେ ଛାଡ଼ିଛନ୍ତି। ଆଉ ଜଣେ ବିଧାୟକ ଗଣମାଧ୍ୟମରେ ପାଣ୍ଡିଆନଙ୍କ ସପକ୍ଷରେ ଖୋଲାଖୋଲି ଓକିଲାତି କରିବାକୁ ପଛାଇ ନାହାନ୍ତି। ଦଳର ସାଂଗଠନିକ ନିର୍ବାଚନ ମଧ୍ୟ ତାଙ୍କ ଇଙ୍ଗିତ‌ରେ କରାଯାଉଥିବା କୁହାଯାଉଛି। ଏସବୁ ଭିତରେ ଯେଉଁ ଚର୍ଚ୍ଚା ବିଜେଡି ଓ ରାଜନୈତିକ ଶିବିରକୁ ଗରମ କରିଛି, ତାହା ହେଲା- ପାଣ୍ଡିଆନ୍ ଏକ ଆନ୍ତର୍ଜାତିକ କମ୍ପାନିରେ ଚାକିରି କରିବେ ଓ ଓଡ଼ିଶା ଛାଡ଼ିବେ। ଏ ସମ୍ପର୍କରେ ନିଜେ ପାଣ୍ଡିଆନ୍‌ ମୁହଁ ଖୋଲିନାହାନ୍ତି। ନବୀନ ନିରବ ଅଛନ୍ତି। ଯୋଜନାବଦ୍ଧ ଭାବେ ଏ ଖବର ବାହାରକୁ ଛଡ଼ାଯାଇଛି ନା ଏଥିରେ ସତ ଅଛି, ତାହା ସମୟ କହିବ। ଗୁରୁତ୍ବପୂର୍ଣ୍ଣ କଥା ହେଲା, ଦଳୀୟ ଆଭ୍ୟନ୍ତରୀଣ ରାଜନୀତି ଗଡ଼ବଡ଼ ଥିଲା ବେଳେ ନବୀନ ପୁଣି ଦିଲ୍ଲୀ ଯାଇଛନ୍ତି। ୭ଦିନ ପରେ ଫେରିବେ। ନବୀନଙ୍କ ବାରମ୍ବାର ଦିଲ୍ଲୀ ଗସ୍ତର କାରଣ ଖୋଜୁଛନ୍ତି ଦଳୀୟ ନେତା। କିଛି ଦିନ ତଳେ ନବୀନ ଦିଲ୍ଲୀ ଯାଇଥିଲେ ଓ ତା’ ପରେ ପାଣ୍ଡିଆନ୍‌ଙ୍କ ବିଦେଶ ଚାକିରି ଚର୍ଚ୍ଚା ପଦାକୁ ଆସିଥିଲା। ଏଥର ବି ତାଙ୍କ ସହ ପାଣ୍ଡିଆନ୍ ଦିଲ୍ଲୀ ଯାଇଛନ୍ତି। କିନ୍ତୁ କେଉଁ କାରଣ ପାଇଁ ଏତେ ଦିନ ନବୀନ ଦିଲ୍ଲୀରେ ରହିବେ, ତାହା ସ୍ପଷ୍ଟ ହୋଇନି।