ଆଜି ସାଲେପୁର ଗସ୍ତରେ ଭିକେ ପାଣ୍ଡିଆନ

ଭୁବନେଶ୍ୱର : ବିଜେଡି ପ୍ରାର୍ଥୀଙ୍କ ପାଇଁ ସାରା ରାଜ୍ୟରେ ମାରାଥନ ପ୍ରଚାର କରୁଛନ୍ତି ପାଣ୍ଡିଆନ | ଆଜି ସାଲେପୁର ଗସ୍ତରେ ଯାଇ ବିଜେଡି ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି ଭିକେ ପାଣ୍ଡିଆନ । ସେଠାରେ ଆୟୋଜିତ ଜନସଭାରେ ବିରୋଧୀ ବିଜେପିକୁ ଟାର୍ଗେଟ କରି କହିଛନ୍ତି, ଏବେ ପ୍ରଧାନମନ୍ତ୍ରୀ ଓଡ଼ିଶାକୁ ଆସି କହୁଛନ୍ତି ଧାନର ଏମଏସପି ୨୨୦୦ ଟଙ୍କା ମିଳୁଛି ଏହା ମୋତେ ଦୁଃଖ ଦେଉଛି । କିନ୍ତୁ ଓଡ଼ିଶାରେ ଚାଷୀକୁ ୨୨୦୦ ଟଙ୍କା କିଏ ଦେଉଛି? କେନ୍ଦ୍ର ସରକାର ହିଁ ଧାନର ଏମଏସପି ଦେଉଛି । ଏହା ରାଜ୍ୟର କ୍ଷମତା ନୁହେଁ । ଭୋଟ ପାଇଁ କେତେ ମିଛ କହିବେ ପ୍ରଧାନମନ୍ତ୍ରୀ ।

ସେହିପରି ସମ୍ବଲପୁରରୁ କଟକ ଏନଏଚ – ୫୫କୁ ନେଇ ପ୍ରଧାନମନ୍ତ୍ରୀଙ୍କୁ ପ୍ରଶ୍ନ ପଚାରିଛନ୍ତି ପାଣ୍ଡିଆନ | ସେ କହିଛନ୍ତି ପ୍ରଧାନମନ୍ତ୍ରୀ କହୁଛନ୍ତି, ଯେଉଁ ରାଜ୍ୟରେ ଡବଲ ଇଞ୍ଜିନ ସରକାର ଚାଲିଛି ସେଠାରେ କାମ ଜୋରସୋରରେ ହେଉଛି । କିନ୍ତୁ ପ୍ରଧାନମନ୍ତ୍ରୀଙ୍କୁ ଅନୁରୋଧ କରୁଛି, ଥରେ ସମ୍ବଲପୁରରୁ କଟକ ଏନଏଚ୍-୫୫ରେ ଆସନ୍ତୁ । ଏହି ରାସ୍ତା କେନ୍ଦ୍ର ଅଧୀନରେ ଆସୁଛି । ଦୀର୍ଘ ୮ ବର୍ଷ ହେଲାଣି କାମ ଚାଲୁଛି ସରୁନି । ୨ ହଜାରରୁ ଅଧିକ ଲୋକଙ୍କର ମୃତ୍ୟୁ ହେଲାଣି । କେଉଁଠି ଗଲା କେନ୍ଦ୍ର ସରକାରଙ୍କ ସ୍ପିଡ କାମ । କିନ୍ତୁ ମୁଖ୍ୟମନ୍ତ୍ରୀ ୩ ବର୍ଷରେ ବିଜୁ ଏକ୍ସପ୍ରେସ ୱେ ଭଳି ନୂଆ ରାସ୍ତା କରି ଦେଖାଇଛନ୍ତି । ୮ ବର୍ଷରେ କେନ୍ଦ୍ର ପୁରୁଣା ରାସ୍ତାଟିଏ ମଧ୍ୟ ସମ୍ପୂର୍ଣ୍ଣ କରିପାରୁନି । ଏହା ପ୍ରଧାନମନ୍ତ୍ରୀଙ୍କ ଡବଲ ଇଞ୍ଜିନ ବୋଲି କି ପ୍ରଶ୍ନ କରିଛନ୍ତି ପାଣ୍ଡିଆନ ।

ସ୍ୱଚ୍ଛତାକୁ ନେଇ ପାଣ୍ଡିଆନ କହିଛନ୍ତି, ପ୍ରଧାନମନ୍ତ୍ରୀ ଉଭୟ ରାଜ୍ୟସଭା ଓ ଲୋକସଭାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଂଶସା କରିଛନ୍ତି । ଯଦି ଜଣେ ମୁଖ୍ୟମନ୍ତ୍ରୀ ସ୍ୱଚ୍ଛତାର ସହ କାମ କରନ୍ତି ତେବେ ରାଜ୍ୟ ଉପରକୁ ଯିବ । ଏହାପୂର୍ବରୁ ମୁଖ୍ୟମନ୍ତ୍ରୀଙ୍କୁ ପ୍ରଂଶସା କରିଛନ୍ତି । କିନ୍ତୁ ଏବେ ନିର୍ବାଚନ ଅଛି ବୋଲି ପ୍ରଧାନମନ୍ତ୍ରୀ ଅଲଗା ଭାଷା କହୁଛନ୍ତି । ନବୀନ ବାବୁଙ୍କ ସ୍ୱଚ୍ଛତା, ନବୀନଙ୍କ ନିସ୍ୱାର୍ଥପର କାମକୁ ଓଡ଼ିଶାବାସୀ ଜାଣିଛନ୍ତି ତେଣୁ ବାରମ୍ବାର ଆଶୀର୍ବାଦ କରୁଛନ୍ତି । ଆସନ୍ତା ଜୁନ୍ ୯ରେ ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ଭାବେ ପୁଣିଥରେ ଶପଥ ଗ୍ରହଣ କରିବେ ବୋଲି ପୁଣି ଥରେ ଆୟୋଜିତ ସଭାରେ ଦୋହରାଇଛନ୍ତି ପାଣ୍ଡିଆନ |

ଶପଥ ନେବା ପରେ ମୁଖ୍ୟମନ୍ତ୍ରୀ ପ୍ରଥମ ଦସ୍ତଖତରେ ମାଗଣା ବିଜୁଳି, ଦ୍ୱିତୀୟ ଦସ୍ତଖତରେ ସମସ୍ତଙ୍କୁ ବିଏସକେୱାଇ ଓ ତୃତୀୟ ଦସ୍ତଖତରେ ମିଶନ ଶକ୍ତି ମା’ଙ୍କୁ ଭତ୍ତା ପ୍ରଦାନ କରିବାକୁ ମୋହର ମାରିବେ । ନବୀନ ସେବା କରିବାକୁ ଆସିଛନ୍ତି କ୍ଷମତା ପାଇଁ ନୁହେଁ । ଯିଏ କ୍ଷମତା ପାଇଁ ରାଜନୀତି କରୁଛନ୍ତି ସେମାନେ ମିଛ କଥା କହିବେ, ଅପପ୍ରଚାର କରିବେ ଏବଂ ନିର୍ବାଚନ ଆଗରୁ କୁମ୍ଭୀର କାନ୍ଦଣା କାନ୍ଦିବେ ।