ଘରେ ବର୍ଷା ପାଣି, ହନ୍ତସନ୍ତ ଲୋକେ: ସ୍ଥାୟୀ ସମାଧାନ ଦାବିରେ ରାସ୍ତାରୋକ୍

ମାଲକାନଗିରି: ମାଲକାନଗିରିରେ ଲଗାଣ ବର୍ଷା ଯୋଗୁଁ ହନ୍ତସନ୍ତ ଗ୍ରାମବାସୀ। ଘରେ ବର୍ଷା ଜଳ ପଶିଯିବାରୁ ନାହିଁ ନଥିବା ଅସୁବିଧା ଭୋଗୁଛନ୍ତି ହାଟପଦା ସାହିର ଲୋକେ । ତେଣୁ ଏହାର ସ୍ଥାୟୀ ସମାଧାନ ଦାବିରେ ଲୋକେ ରାଜରାସ୍ତା ଅବରୋଧ କରିଛନ୍ତି। ଏହି ସାହିର ପାର୍ଶ୍ଵରେ ବାଲି ସାଗର ବନ୍ଧ ରହିଛି। ତେଣୁ ବର୍ଷା ହେଲେ ଜଳ ନିଷ୍କାସନ ହୋଇନପାରି ଘର ଭିତରକୁ ବର୍ଷା ପାଣି ପଶିଯାଉଛି। ଫଳରେ ଅନେକ କଛା ଘର ନଷ୍ଟ ହେଉଛି । ଏଠାରେ ରହୁଥିବା ଅନେକ ଗରିବ ଶ୍ରେଣୀର ଲୋକେ ପ୍ରତିବର୍ଷ ଏପରି ସମସ୍ୟା ଭୋଗୁଥିବା ସହ ଅସ୍ୱାସ୍ଥ୍ୟକର ପରିବେଶ ଯୋଗୁଁ ଲୋକେ ବିଭିନ୍ନ ରୋଗର ସାମ୍ନା କରୁଛନ୍ତି। କିନ୍ତୁ ପୌର ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉନି। ଯାହାକୁ ନେଇ ସ୍ଥାୟୀ ସମାଧାନ ଦାବିରେ ଲୋକେ ଜିଲ୍ଲା ସଦର ଦେଇ ଯାଇଥିବା ୩୨୬ ଜାତୀୟ ରାଜପଥକୁ ଅବରୋଧ କରିଛନ୍ତି । ନିର୍ଧୁମ ବର୍ଷା ସତ୍ୱେ ବସ ଷ୍ଟାଣ୍ଡ ନିକଟରେ ଏହି ଅବରୋଧ ଯୋଗୁଁ ଯାତାୟାତରେ ବାଧା ଉପୁଜିଥିବା ଦେଖିବାକୁ ମିଳିଛି ।