ବିଚାର ଅପେକ୍ଷାରେ ପଡି ରହିଛି ଅନେକ ମାମଲା

ଭୁବନେଶ୍ବର: ଓଡିଶା ହାଇକୋର୍ଟ ଓ ଅନ୍ୟାନ୍ୟ ଅଦାଲତଗୁଡିକରେ ଏବେ ୨୦ ଲକ୍ଷ ୬୫ ହଜାର ୭୧୬ଟି ଦେୱାନୀ, ଫୌଜଦାରୀ ଓ ଅନ୍ୟାନ୍ୟ କିସମର ମାମଲା ବିଚାର ପାଇଁ ରହିଛି। ଶନିବାର ବିଧାନସଭାରେ ବିଜେପି ବିଧାୟକ ଟଙ୍କଧର ତ୍ରିପାଠୀଙ୍କ ଏକ ପ୍ରଶ୍ନର ଉତ୍ତରରେ ଏହି ସୂଚନା ଦେଇଛନ୍ତି ଆଇନ୍‍ ମନ୍ତ୍ରୀ ପୃଥୀରାଜ ହରିଚନ୍ଦନ।
ସେ କହିଛନ୍ତି ଯେ କେନ୍ଦ୍ର ସରକାରଙ୍କ ଏନ୍‍ସିଆରବି ଓ ରାଜ୍ୟ ସରକାରଙ୍କ ଏନ୍‍ସିଆରବିର ତଥ୍ୟ ମୁତାବକ ୨୦୧୪ ମସିହାରେ ଅପରାଧିକ ମାମଲାର ଫଏସଲା ହାର ଶତ ପ୍ରତିଶତରୁ ଅଧିକ ରହିଥିବା ବେଳେ ଦୁର୍ନୀତି ମାମଲାର ଫଏସଲା ହାର ପାଖାପାଖି ୮୦% ରହିଥିଲା। ସେହି ବର୍ଷ ୩୫ ହଜାର ୭୦୩ଟି ଅପରାଧିକ ମାମଲାର ଫଏସଲା ହୋଇଛି। ସେହିଭଳି ୨୦୨୩ରେ ୪୩ ହଜାରରୁ ଅଧିକ ମାମଲା ଆସିଥିବା ବେଳେ ୪୫ହଜାରରୁ ଅଧିକ ମାମଲା ଫଏସଲା ହୋଇଛି। ଏହିବର୍ଷ ମାମଲା ହାର ୧୦୯%ରୁ ଅଧିକ ରହିଥିଲା। ଦୁର୍ନୀତି ମାମଲାର ଫଏସଲା ହାର ମଧ୍ୟ ୨୦୨୩ରେ ୭୦%ରୁ ଅଧିକ ରହିଥିବା ମନ୍ତ୍ରୀ କହିଥିଲେ।