କିଏ ହବ ଭାରତୀୟ କ୍ରିକେଟ ଟିମ୍ର ମୁଖ୍ୟ କୋଚ: ଜୟ ଶାହା
1 min read![](https://www.dinalipi.in/wp-content/uploads/2024/05/images-11.jpg)
ନୂଆଦିଲ୍ଲୀ: ବିସିସିଆଇ ସଚିବ ଜୟ ଶାହା କହିଛନ୍ତି ଯେ ଭାରତୀୟ କ୍ରିକେଟ୍ ଦଳର ମୁଖ୍ୟ ପ୍ରଶିକ୍ଷକଙ୍କ ପାଇଁ କୌଣସି ଅଷ୍ଟ୍ରେଲୀୟ ଖେଳାଳିଙ୍କୁ ଅଫର୍ ଦିଆଯାଇନି। ୱେଷ୍ଟଇଣ୍ଡିଜ୍ ଏବଂ ଯୁକ୍ତରାଷ୍ଟ୍ର ଆମେରିକାରେ ହେବାକୁ ଥିବା ଟି -୨୦ ବିଶ୍ୱକପ ୨୦୨୪ ପରେ ରାହୁଲ ଦ୍ରାବିଡଙ୍କ କାର୍ଯ୍ୟକାଳ ଶେଷ ହେବାକୁ ଯାଉଥିବାରୁ ଭାରତୀୟ ବୋର୍ଡ ଏହି ଚାକିରି ପାଇଁ ଏକ ପଦ ଖାଲି ଥିବା ଘୋଷଣା କରିଛି।
ଏହି ଭୂମିକା ପାଇଁ ଆବେଦନ କରିବାର ଶେଷ ତାରିଖ ମେ ୨୭ ତାରିଖସନ୍ଧ୍ୟା ୬ଟା ସ୍ଥିର କରାଯାଇଛି। ନିକଟରେ ଖବର ପ୍ରକାଶ ପାଇଥିଲା ଯେ ବିସିସିଆଇ ଏହି ଭୂମିକା ପାଇଁ ୨ ଥର ବିଶ୍ୱକପ ବିଜେତା ଅଷ୍ଟ୍ରେଲୀୟ ଅଧିନାୟକ ରିକି ପଣ୍ଟିଙ୍ଗଙ୍କ ନିକଟକୁ ଯାଇଥିଲା। ତେବେ ଜୟ ଶାହା ଗଣମାଧ୍ୟମର ରିପୋର୍ଟକୁ ଅସ୍ୱୀକାର କରି କହିଛନ୍ତି ଯେ ଚାକିରି ପାଇଁ ଉପଯୁକ୍ତ ପ୍ରାର୍ଥୀ ଖୋଜିବା ପାଇଁ ଏକ ‘ଉପଯୁକ୍ତ’ ପ୍ରକ୍ରିୟା ଅନୁସରଣ କରାଯିବା ଆବଶ୍ୟକ। ଏଥିପାଇଁ କୌଣସି ଅଷ୍ଟ୍ରେଲୀୟଙ୍କୁ କୁହାଯାଇନାହିଁ।
“ମୁଁ କିମ୍ବା ବିସିସିଆଇ ଅଷ୍ଟ୍ରେଲିଆର କୌଣସି ପୂର୍ବତନ କ୍ରିକେଟରଙ୍କ ନିକଟକୁ ଯାଇ କୋଚ ହେବା ପାଇଁ ଅଫର ଦେଇନାହୁଁ। ନିର୍ଦ୍ଦିଷ୍ଟ ଗଣମାଧ୍ୟମରେ ପ୍ରସାରିତ ହେଉଥିବା ଏହି ଖବର ସମ୍ପୂର୍ଣ୍ଣ ଭୁଲ୍। ଆମ ଦଳ ପାଇଁ ଉପଯୁକ୍ତ କୋଚ୍ ଖୋଜିବା ଏକ ଉପଯୁକ୍ତ ଏବଂ ପୁଙ୍ଖାନୁପୁଙ୍ଖ ପ୍ରକ୍ରିୟା ଅନୁସରଣ କରାଯିବ’’ ବୋଲି ସେ କହିଛନ୍ତି। ଏପଟେ ଟିମ ଇଣ୍ଡିଆର ମୁଖ୍ୟ କୋଚ ରେସରେ ଏଣିକି ଗମ୍ଭୀର ବିସିସିଆଇର ପ୍ରଥମ ପସନ୍ଦ ବୋଲି କୁହାଯାଉଛି।