ପୋଖରୀରେ ବୁଡ଼ି ୩ ଶିଶୁଙ୍କର ମୃତ୍ୟୁ

ଭଦ୍ରକ: ହସ ଖୁସିରେ ଅଙ୍ଗନବାଡ଼ି କେନ୍ଦ୍ରକୁ ଯାଇଥିଲେ ପାଠପଢ଼ିବାକୁ, ହେଲେ ଆଉ ଫେରିଲେନି ଘରକୁ। ଅଙ୍ଗନବାଡ଼ି କେନ୍ଦ୍ର ନିକଟରେ ଥିବା ଏକ ପୋଖରୀରେ ବୁଡ଼ି ପ୍ରାଣ ହରାଇଲେ ତିନିଜଣ ଶିଶୁ। ଏହି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ହାଟଡ଼ିହି ବ୍ଲକ ଆତ୍ରୁକଣା ଗାଁରେ। ମଙ୍ଗଳବାର ସକାଳେ ଆତ୍ରୁକଣା ଅଙ୍ଗନବାଡ଼ି କେନ୍ଦ୍ରକୁ ପାଠପଢ଼ିବା ପାଇଁ ଯାଇଥିଲେ ପାୟଲ ପାତ୍ର, ଭାରତୀ ପାତ୍ର ଏବଂ ଲିପ୍ସା ପାତ୍ର। ପାଠପଢ଼ା ସରିବା ପରେ ପିଲାମାନେ ଅଙ୍ଗନବାଡ଼ି କେନ୍ଦ୍ର ବାହାରେ ଖେଳୁଥିଲେ। ଏହି ସମୟରେ ପାୟଲ, ଭାରତୀ ଏବଂ ଲିପ୍ସା ନିକଟରେ ଥିବା ପୋଖରୀ ନିକଟକୁ ଚାଲିଯାଇଥିଲେ। କିଛି ସମୟରେ ଏହି ତିନିଶିଶୁ ପୋଖରୀରେ ବୁଡ଼ିଯାଉଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ। ତୁରନ୍ତ ଶିଶୁମାନଙ୍କୁ ଉଦ୍ଧାର କରିବାକୁ ଗ୍ରାମବାର କିଛି ବ୍ୟକ୍ତି ପୋଖରୀ ମଧ୍ୟକୁ ପଶିଥିଲେ। ଗୁରୁତର ଅବସ୍ଥାରେ ପାୟଲ, ଲିପ୍ସା ଓ ଭାରତୀଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରାଯାଇଥିଲା। କିନ୍ତୁ ଡାକ୍ତର ୩ ଶିଶୁଙ୍କୁ ମୃତ ଘୋଷଣା କରିଥିଲେ। ତିନି ଶିଶୁଙ୍କ ମୃତ୍ୟୁକୁ ନେଇ ଆତ୍ରୁକଣା ଗାଁରେ ଶୋକର ଛାୟା ଖେଳିଯାଇଛି।